Leev Gäste, leev Boßeler- un Klootscheeterfamilie,
mi is dat as ehemalig Vörsitter een besünnern Ehr, vandag öwer dat 50 johrig Geburtsdagskind, öwer uns "Vörut" Mambörg, to vertell`n. Dorbi will ick de Minschen mit hör Handeln un Ideen to de Beleevung van dat Vereensläben in de Middelpunkt stelln, aber ok de anner Entwicklungen nich vergeten.
Veer Mannlü, Christoph Christophers, Johannes Dasenbroock, Heinrich Deppermann un Ihno Taken truffen sück jeden Wäck ton gemütlichen Skatabend un keemen denn ok nich an dat Thema Freesenspill verbi. Een Inladung nah Nobiskrog to de Gründungsversammlung an 1. Märt 1956 kemen 49 Mannlü nah.
1. Vörsitter wur Johannes Dasenbroock. Ok sien Skatkollegen funden sück as 2. Vörsitter, stellvertredend Kasseerer und Jugendwart in de Vörstand wer. As Upgaben för de Vereeen geef de 1. Vörsitter ut: 1. dat Freesenspill to bedrieben un fördern. 2. de Gemeenschaftsgedanken innerhalb van dat Dörp mit sein negen Ortsdeelen to stärken un 3. sück de Heimatgedanken vör allem dör de Pfleg vant Plattdütsch zu verpflichten. 2 Mark Upnahmgebühr muß jeder Vereensmitglied betahlen un ok de Johresbiedrag wur up disse Bedrag fastsett`t. De Anschaffung an Boßel- un Klootscheetergerätschaften wur beschlaten un um de Vereensfahn sulln sück twee Fron kümmern.
Bi dat erst Vereensfest an 5. August kunnen sück de Vereensmitglieder un Jugendlichen bit to 16 Johr up insgesamt 6 Boßelstände un bi dat Zielboßeln meten. 250 Mark kunn`n för Pries utgeben worn. De Saal stell Vereenswirt Johann Konken unentgeltlich för een Danzvergnögen nah dat Priesscheeten to Verfögung.
Up 81 Mitglieder weer de Mitgliedertahl vant Vereen bit August 56 anwursen. In November 56 wur dat erste Mal een Theater- un Danzabend in Erholung bi Hinni Ippen anbaden. De Huskapell köst domals 60 Mark. An 11.11.1956 erfolg de Upnahm van "Vörut" as 27. Vereen in de Kreisverband VIII Esens.
1957 wur im Rahmen vant Sömmerfest ok erstmalig dat Klootscheeten anbaden; meten wur mit een Latt van fief Meter. Dat Fest klung ut mit een Danzvergnögen. Ick hebb dat Geföhl, domals harr man mehr Tied vör sien Mitminschen oder de eenfach gern mal fiern.
Ok een Utfluch wur 1957 erstmalig plant un de Vereen geef een düchdigen Toschuss van 300 Mark ut Kass; mitfohrn kunn man för 2 Mark. In de best Tieden nehm`n öwer 100 Personen an de Vereensutflüg mit Bus deel.
Regelt wurn in de nächst Johrn de Deelnahm an Beerdigungen mit Anzeig un Schleifenkranz, Upmarksamkeiten bi Sülvern un Golden Hochtieden, wählt wurn Gruppenföhrers för dat Boßeln, Bahnwiesers, Stocklergers un ok een Schiedsmann.
Öwer de Deelnahm van Utwärtigen ant Dörpfest muss de Kortenverköper entscheeden. Well wegen Unstimmigkeiten ut de Vereen uttreden de, wur nich wer upnahmen. 1959 weer een besünners Johr; een Vereensfahn kunn för 385 Mark köfft worn; Remmers ut Leerhaf hett de herstellt.
Vandag schelln wi ja faken öwer de GEMA, aber ok 1959 muß een Lustbarkeitsstür van 20 Mark för dat Dörpfest entricht`t worn und för de Fahnenspenden kreeg domals all de GEMA13 Mark un 95 Pennig. Een Priesskat geef dat erstmalig 1960. Ok een egen Kegelbahn wur herstellt.
1967 wur all fastlergt, de öwer 70-johrigen Vereensmitglieder van de Vereensbiedrag to befreen. Nah 10 Johr harr de Vereen 123 Mitglieder, dorvan 5 Ehrenmitglieder.
De Boßelsport keem im Loop van de Johren immer mehr in de Mittelpunkt van dat Vereensläben. Nahdem erst ünnernanner öft worn weer, keem dat to Fründschaftkämpfen mit Nabervereens. Um fief Mark gung dat mesttied oder`n Buttel Schluck.
An de Punktspöölbetrieb bedeelig sück de Vereen ant Enden van de 60-er Johrn un kunn in 5 Johr vant Kreisklass in de Landesliga 1973 upstiegen. Dat weer natürlich stur, mit de egen Dörpslü disse Klass länger to holln, aber dat gung bit 1981 good. Ok dornah is Mambörg noch twee Mal in de Landesliga upstegen. De Toschuss van 1000 Mark för eenheitlich Trikots ünnerstreek, dat de Boßelsport immer mehr Bedüdung in dat Vereensläben kreeg.
An 6.5.1974 wur de Froenafdeelung gründt un Frieda Tjarks to de erste Damenwartin wählt. 38 Damen keemen bi de Gründungsversammlung tosamen un hebbt as Instand all 4 Mark betahlt. Mannlü, de dornah upnahmen worn sünd, hebbt wiederhen 2 Mark betohlt. Dor sall mi noch een wat van Gliekberechtigung vertelln.
Schöler un een Jugendgrupp nehm`n erstmalig in de Saison 1974/75 an de Spöölbetrieb deel. De Ära van Johannes Dasenbroock end up sien egen Wunsch nah 25 Johr Vörstandsarbeit. Entsprekend wur sien vörbildlich Vereensföhrung van de Vereen dör de Ehrenvörsitz ( de Vörschlag keem van Hinni Decker ) un anner passend Geschenke würdigt. Van hum un sien Fro kreeg de Vereen 4 Pokalen, de wi as Mesterpokalen bi de Jugend, Frolü un Mannlü vandag noch int Harst utscheeten. Ok de tweet´t Fahn, de Ji hier ant Wand sehn könnt, wur van hum stift, dormit dat Original nich so vööl lieden muss.
Nahfolger wur van 1981 bit 1989 Focke Tjarks. He harr vörher as 2. Vörsitter un Boßelobmann all in de Vereensarbeit aktiv mitwirkt.
1989 wur dormit anfangen, de Biedrag öwert Bank intotrecken. Dat weer vör eenig Vereensmitglieder nich de richtige Lösung un se bestunden widerhen up "Barzahlung". Up Vörschlag van Hilde Dirks kriegen de Ehrenmitglieder siet 1984 ok een Urkun öwer disse Ehrenmitgliedschaft öwerreicht.
1987 trenn sück de Laienspölschor kassenmäßig vant Vereen. Erstmalig een 3. Vörstand geef dat 1988 mit Annegrete Oelrichs.
1989 geef Focke Tjarks de 1. Vörsitz an sien bisherig Vertreder Helmut Oelrichs af.
1991 beschlot de Johreshauptversammlung öwer een Vereenssatzung und de Indragung in dat Vereensregister kunn erfolgen.
Sportlich gung dat ok wieder un bi de Eenzelmeisterschaften 1991 kunn Vörut de Mannschaftswertung erstmalig gewinn`n. Dorto keem in dat Johr all ton veerten Mal achternanner de Samtgemeendgesamtpokal.
Int Jugendbereich geef dat 1992 seker de grötste Erfolg, as de weiblich Jugend A nich blood Kreis, Landes- und FKV-Meister wur, sondern ok bi de Freesisch Mehrkampf de erste Platz int Kreisverband belerg. As dat Vereenslokal dicht makt worn sull, stell de Vereen 1993 vörsorglich een Andrag bied Gemend, up dat gemeendeegene Grund bied Gemeendhus een Vereensheim uptoboen. Ok wur een Andrag an de Gemeend stellt, för Meisterschaften un dormit verbundene Kösten een Toschuss to gewähren. Dorvan profiteern vandag noch all Vereene in uns Gemeend.
1993 wur erstmalig een Gästeboßeln anbaden. De Ideengeber weer de domalig 2. Vörsitter Manfred Janssen. Mittlerwiel is disse Veranstaltung för de Gäste vant Teltplatz in Bensersiel, dor hett Karl ok mit för de Werbung sörgt, un ok för de Gäste int Gemeend un ut de nähere Umgebung een ganz intressant Vergnögen, bi de se mennig Kort lösen, um een Medaille oder de Pokal för de wietste Schööt to erringen. Dat Boßeldiplom kriegen all mit hör best Ergebnis.
An 20.11.1993 wur denn offiziell de ehemalig Vereenslokal "Nobiskrog" as Vereensheim öwernomen. Dat weer tosätzlich Arbeit för de Vereensmitglieder, aber broch ok tosätzlich wat ant Kass. Leider geef dat wegen Mietanpassungen un de Nutzung för verscheeden Veranstaltungen Meenungsverscheedenheiten. Een besünnern Jubiläumspokal kunn`n 1994 de Mannlü II Mannschaft erringen, as de Boßellandesliga in Burhafe sien 25 johrig Bestahn fiern de.
Erstmalig öwer 300 Mitglieder harr "Vörut" 1996, worbi vööl Vereensmitglieder sück an een Mitgliederwerbeaktion bedeeligt hebbt. Ick kann mi noch genau erinnern, as Holger Witthus för dat Dörpfest mi 10 Anmeldungen öwergeef, un dormit de Schallgrenz öwerschreeden wur. To een Grill`n wurn de Warbers denn noch van de 1. Vörsitter inladen.
2001 öwernahm Norbert Oelrichs de Vörsitz bi Vörut und schlog bi disse Johreshauptversammlung vör, Vörut ok int Internet dortostelln.
In een tosätzlichen Versammlung wur an 22.06.2001 beschlaten, een egen Vereensheim to boen un de Vörstand kreeg de Updrag, sück um een entspreckend Grundstück to kümmern. In de Versammlung April 2002 kunn de Vörsitter denn öwer een Grundstückskoop berichten, de vörbehaltlich de Änderung van de Flächennutzungsplan vörnahmen wur.
Ende Mai 2002 kunn dat denn all los gahn mit de Vereensheimsbo hier ant Hoch Weg. Dusende Stünden hebbt de Facharbeiters, Helpers un de mit Pen umgahn könnt verbrocht, um dat goode Wark bit ton September 2002 to vollenden. Ok de Finanzeerung leep dank disse kostenlos Hülp, de Ünnerstützung vant Gemeend, de Landessportbund, dör Spenden un toletzt noch dör een Toschuss vant Landkreis Wittmund good mit. In September weer denn all Inwehung. Uns domalig Pastor Edzard Reinders hett an 22.09.2002 een wunderboren Andacht rund um uns Boßelgerätschaften holln.
In August 2003 kunn de Johannes Dasenbroock Klootscheeterplatz inweht worn. Mit Schleuderball un Flüchterkloot hebbt sück an 17.08.2003 de mehrfach Europameister Hans-Georg Bohlken, de Europameister int Klootscheeten und Rekordholler Stefan Albarus, de mehrfach Dütsch Jugendmeister int Schleuderball, Frank Goldensteen un de amteerende Europameister mit de Hollandkugel, Dirk Taddigs, meten. De schooten mit Schleuderball all öwer 70 m un de Wettkampf kunn Hans-Georg Bohlken mit de Kloot denn för sück entscheeden.
2004 geef dat de nächst Wessel ant Spitz vant Vereen, de sietdem van Horst Emken föhrt wurd. Sied August 2004 is uns Vereen schuldenfree.
In uns Jubiläumsjohr geef dat all erst sportlich Erfolge dör twee Jugendmannschaften. Dat is besünners erfreulich.
Een poor Wünsche hebb ick ton Afschluss: 1. De Mannlü I sallt weer up Landesebene boßeln. 2. För de sportliche Förderung van uns Jugend sulln wi noch mehr Tied upwenden; dat is uns Tokunft. 3. Dat Mitnanner sall nich blood int Vereensleben, sondern ok in uns Tosamenleben grood schreben worn.
Laat`t uns dornah handeln, denn is mi nich bang um de Tokunft van uns "Vörut" Mambörg. Bi Jo bedank ick mi fört Tohörn. "Lüch up un Fleu herut".